Xəbərlər
'British Council' Rusiyada 'arzuolunmaz təşkilat' elan olunub
Rusiya Baş Prokurorluğu "British Council"ı "arzuolunmaz təşkilat" elan edib. Bu barədə məlumat Baş Prokurorluğun saytında dərc olunub.
1934-cü ildə əsası qoyulan "British Council" Birləşmiş Krallıqla digər ölkələr arasında təhsil, mədəniyyət və incəsənət sahəsində əməkdaşlığın inkişafına xidmət edir. Təşkilat dünyanın 100-dən çox ölkəsində fəaliyyət göstərir.
Onun əsas fəaliyyət istiqamətlərindən biri xarici ölkələrin vətəndaşları üçün ingilis dilinin tədrisinin təşkili və təşviqidir. "British Council" xüsusilə IELTS imtahanının təşkilində iştirak edir.
"British Council" hazırda Rusiyada fəaliyyət göstərmir. Təşkilatın Moskvadakı sonuncu ofisi 2018-ci ildə London və Moskva arasında diplomatik münasibətlərin kəskin şəkildə pisləşməsi fonunda bağlanıb. Təşkilat 20 ildən artıq idi ki, Rusiyada fəaliyyət göstərirdi.
Rusiya Baş Prokurorluğunun bəyanatında qeyd olunur ki, sözügedən təşkilat "təhsil və mədəni fəaliyyət adı altında ...ingilis dilinin tədrisi bəhanəsi ilə... təhsil, mədəniyyət və gənclər siyasəti sahəsində Britaniyanın uzunmüddətli maraqlarını və dəyərlərini təbliğ edir".
Rusiya Baş Prokurorluğu əlavə edir ki, təşkilat "ölkəmizdə qadağan olunmuş LGBT hərəkatını fəal şəkildə təbliğ edir və dəstəkləyir". Təşkilatın öz işini "Böyük Britaniya hökumətinin prioritetlərinə uyğun olaraq" təşkil etdiyi iddia olunur.
"Current Time"ın xəbərinə görə, Rusiya Federal Təhlükəsizlik Xidməti (FSB) də ayrıca bəyanat yayıb. FSB iddia edib ki, Böyük Britaniyanın xüsusi xidmət orqanları "British Council"dan digər ölkələrin suverenliyinə qarşı əməliyyatlar aparmaq üçün istifadə edir.
FSB həmçinin Rusiyanın "dost" adlandırdığı ölkələrə öz dövlətlərinin ərazisində təşkilatın fəaliyyətini dayandırmağı tövsiyə edib.
"British Council" Rusiya hökumətinin qərarını hələ ki şərh etməyib. Son illərdə Rusiya hakimiyyəti 200-dən çox beynəlxalq və xarici təşkilatı "arzuolunmaz təşkilat" kimi tanıyıb. Onların arasında əsas insan haqları, elmi, humanitar təşkilatlar, media qurumları, o cümlədən Azad Avropa/Azadlıq Radioları da var. Rusiya vətəndaşları üçün bu cür təşkilatlarla əməkdaşlıq qadağandır. Bir neçə nəfər bu cür əməkdaşlığa görə cinayət məsuliyyətinə cəlb olunub.
Prezidentlər hazırkı dönəmi Azərbaycan-İran əlaqələrinin inkişafında dönüş sayırlar
İyunun 4-də Azərbaycan prezidenti İlham Əliyev ilə İran İslam Respublikasının prezidenti Məsud Pezeşkian arasında telefon danışığı olub.
Bu barədə Azərbaycan Prezidentinin Mətbuat Xidməti məlumat yayıb.
Məlumata görə, telefon danışığında hazırda iki ölkənin aidiyyəti dövlət qurumlarının M.Pezeşkianın bu ilin aprelində Azərbaycana rəsmi səfəri zamanı qarşıya qoyulan tapşırıqların həyata keçirilməsi üçün səylərini davam etdirdikləri vurğulanıb. Səfərin nəticəsi olaraq Bakı-Təbriz aviareysinin bərpası və Bakı-Tehran istiqamətində təyyarə reyslərinin artırılması qeyd edilib.
Azərbaycan-İran əlaqələrinin inkişafında hazırda dönüş nöqtəsinin olduğu vurğulanıb və birgə səylərlə iki ölkə arasında münasibətlərin müxtəlif sahələrdə dinamik surətdə inkişaf edəcəyinə ümidvarlıq bildirilib.
3 iyun
Bakı–Təbriz–Bakı marşrutu üzrə reyslər bərpa edilir
Azərbaycanın milli aviadaşıyıcısı AZAL iyunun 15-dən etibarən Bakı–Təbriz–Bakı marşrutu üzrə reyslərə başlayacaq.
AZAL-dan verilən məlumata görə, bu istiqamət üzrə uçuşlar həftədə iki dəfə – çərşənbə və bazar günləri yerinə yetiriləcək.
AZAL İranın paytaxtı Tehran şəhərinə də reyslərin sayını artırır. Bakı–Tehran–Bakı marşrutu üzrə uçuşlar həftədə dörd dəfə – bazar ertəsi, cümə axşamı, cümə və şənbə günləri yerinə yetiriləcək.
İranla Azərbaycan arasında Təbriz-Bakı və əks istiqamətdə hava reysləri bundan əvvəl də olub, lakin dayanmışdı. Bu, koronavirus pandemiyası ilə izah edilmişdi.
Bakı-Təbriz, Təbriz-Bakı reysi ilk dəfə 2011-ci il sentyabrın 20-də açılmalı idi. Lakin bu yalnız bir il sonra gerçəkləşmişdi.
İranın Təbriz şəhərinin sakinləri, əsasən, Azərbaycan əsilli insanlardır.
Xatırlatma
Son zamanlar İran-Azərbaycan diplomatik münasibətlərində yaxınlaşma müşahidə olunur. Apreldə İran prezidenti Məsud Peşezkian Azərbaycana səfər edib.
Ancaq öncəki illərdə Bakı və Tehranın bir-birinin sərhədinə yaxın ərazilərdə hərbi təlimlər keçirməsi qarşılıqlı narazılıqlar doğurub. 2023-cü il yanvarında isə Azərbaycanın Tehrandakı səfirliyinə silahlı hücum nəticəsində səfirliyin əməkdaşları arasında ölən və yaralananlar olub. Bundan sonra səfirliyin işçiləri Azərbaycana təxliyə edildi.
Yalnız ötən ilin iyulunda Azərbaycanın İrandakı səfirliyinin fəaliyyəti bərpa edilib.
İran bu ilin mayında bildirib ki, Azərbaycan səfirliyinə qarşı törədilmiş ölümcül hücumda təqsirli bilinən şəxs edam edilib.
Suriyadan daha 13 nəfər Azərbaycana gətirilib
İyunun 3-də Suriya Ərəb Respublikasına getmiş 13 nəfər Azərbaycan vətəndaşının ölkələrinə repatriasiyası (vətənə qayıtma) həyata keçirilib.
Bu barədə iyunun 4-də Azərbaycan Xarici İşlər Nazirliyi (XİN) məlumat yayıb.
Nazirlikdən əlavə edilib ki, İraq və Suriyadan Azərbaycan vətəndaşlarının repatriasiyasına məsul olan müvafiq dövlət qurumlarının nümayəndələri Türkiyəyə ezam edilib, repatriantların ilkin tibbi, psixoloji müayinəsi həyata keçirilib.
Son dörd ildə - 2020-2024-cü illər ərzində Suriyadan Azərbaycana 224 ölkə vətəndaşı repatriasiya olunub. Onlardan 172 nəfəri uşaq və 52 nəfəri qadın olub.
Bu barədə XİN-in 2024-cü ilin yekunlarına dair mətbuat buraxılışında vurğulanıb.
Ötən il dövlət büdcəsindən Suriyada saxlanılan Azərbaycan vətəndaşlarının repatriasiyası üçün 44.7 min manat xərclənib.
2011-ci ildə Suriyada vətəndaş müharibəsi başlayıb. Yalnız ötən ilin sonunda Bəşər Əsədin devrilməsi ilə həmin ölkədə vəziyyət nisbətən sabitləşib.
Gürcüstanda NATO və Avropa İttifaqının İnformasiya Mərkəzi bağlanır
2005-ci ildə Gürcüstanda yaradılmış NATO və Avropa İttifaqının İnformasiya Mərkəzi bağlanır. Mərkəzin bəzi əməkdaşları Facebook hesablarındakı paylaşımlarında rəhbərlikdən bildiriş aldıqlarını və qurumun iyulun 1-də bağlanacağını yazıblar.
Gürcüstan Xarici İşlər Nazirliyinin (XİN) mətbuat xidməti AzadlıqRadiosunun gürcü xidmətinə məlumatı təsdiqləyib və bildirib ki, mərkəz yenidən təşkil olunaraq nazirliyə birləşdiriləcək.
Mərkəzin əməkdaşlarına vəzifələrindən azad olunmaları barədə bir ay əvvəldən məlumat verilib.
"İnanırıq ki, bizim əsas missiyamız – ictimaiyyətin Qərb dəyərləri barədə maarifləndirilməsi, vətəndaş cəmiyyətinin aktivləşdirilməsi və onun bu proseslərə cəlb olunmasının asanlaşdırılması ölkəmizin inkişafına mühüm töhfə verəcək", - informasiya mərkəzinin saytında deyilir.
Azərbaycan və Ermənistan itkin düşmüş şəxslərin taleyini aydınlaşdırmaq istəyir
Azərbaycanın və Ermənistanın itkin düşmüş şəxslər üzrə dövlət komissiyalarının nümayəndələri arasında növbəti görüş keçirilib.
Azərbaycanın rəsmi dövlət agentliyi olan AZƏRTAC-ın iyunun 4-də yaydığı məlumata görə, görüş çərçivəsində tərəflər münaqişə zamanı itkin düşmüş şəxslərin taleyinin aydınlaşdırılması ilə bağlı humanitar məsələləri müzakirə ediblər.
Görüşdə məlumat mübadiləsi imkanları, axtarış tədbirlərinin əlaqələndirilməsi məsələləri nəzərdən keçirilib.
Azərbaycan Əsir və itkin düşmüş, girov götürülmüş vətəndaşlar üzrə Dövlət Komissiyasının məlumatına görə, Birinci Qarabağ müharibəsində onlardan 3 min 984 şəxs itkin düşüb. Həmin şəxslərdən 1 min 702-i azad edilib. Komissiya İkinci Qarabağ müharibəsində isə itkinlərin sayını cəmi altı açıqlayıb.
Ermənistan Nazirlər Kabinetinin hesabatına görə isə, Birinci Qarabağ müharibəsi nəticəsində onlardan 777 nəfər itkin düşüb. Rəsmi Yerevanin vurğulamasına görə, 2020-ci ildə yenidən münaqişə gərginləşəndən sonra itkin düşənlərdən 215 Ermənistan və Qarabağdan olan erməni əsilli şəxsin taleyi naməlum olaraq qalır.
Xatırlatma
Ötən əsrin 80-ci illərində kəskinləşən Qarabağ münaqişəsi üzündən Azərbaycan və Ermənistan arasında silahlı toqquşmalar baş verib. 1990-cı illərin əvvəllərində Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə və 2023-cü ildə birgünlük hərbi əməliyyatla Azərbaycan bütün ərazisində suverenliyini bərpa edib. Ondan sonra bölgədən erməni əhali köç edib. Yerevan bunu "etnik təmizlənmə" kimi dəyərləndirib, amma rəsmi Bakı bunu qəbul etməyib. Son illər iki ölkə arasında müxtəlif formatlarda sülh danışıqları aparılsa da, hələlik, sülh sazişi imzalanmayıb.
Tramp polad və alüminiuma rüsumları ikiqat artırdı
ABŞ prezidenti Donald Tramp polad və alüminium idxalına tətbiq olunan rüsumların iki dəfə artırılması – 25 faizdən 50 faizə yüksəldilməsi haqqında qərar imzalayıb. Sözügedən qərar bu gündən, iyunun 4-dən qüvvəyə minir.
Sənəddə deyilir ki, martda tətbiq olunmuş rüsumlar, hələlik, Amerika sənayesinə "sahənin dayanıqlı inkişafı və milli müdafiə tələbatı üçün zəruri olan istehsal gücünü inkişaf etdirməyə və qoruyub saxlamağa imkan verməyib".
Trampın fikrincə, tariflərin artırılması "bu sahələrə daha böyük dəstək verəcək və polad, alüminium və onların törəmələrinin idxalının milli təhlükəsizliyə təhdidini azaldacaq və ya aradan qaldıracaq".
"Bloomberg"in xəbərinə görə, bu qərar Böyük Britaniyaya təsir etməyəcək. Bu ölkədən idxala tətbiq olunan tariflər eyni səviyyədə - 25 faizdə qalacaq.
Prezident Tramp martda polad və alüminium idxalına 25 faizlik rüsum elan edib və bu qərar apreldə qüvvəyə minib. Trampın ticarət müşaviri Piter Navarro o zaman bildirib ki, bu tədbirlər yerli polad və alüminium istehsalçılarını gücləndirməklə milli təhlükəsizliyə töhfə verəcək.
"Polad və alüminiuma tətbiq olunan tariflər xarici dempinqlərə (qiymətlərin süni surətdə endirilməsi) son qoyacaq, yerli istehsalı artıracaq, polad və alüminium sənayemizi Amerikanın iqtisadi və milli təhlükəsizliyinin təməl daşına çevirəcək", - o deyib.
Trampın tənqidçiləri isə bildirir ki, istehsalın artacağına zəmanət yoxdur, ancaq bu tariflər artıq polad və alüminium idxal edən Amerika şirkətlərinə zərbə vurur.
NATO hava hücumundan müdafiə qabiliyyətini artırmaq istəyir
NATO Avropadakı üzvlərindən yerüstü hava hücumundan müdafiə qüvvələrinin imkanlarını beş dəfə artırmağı istəyir. Bu barədə "Bloomberg" məlumatlı mənbələrə istinadən yazıb.
Bildirilib ki, hərbi alyans Rusiyanın təcavüz təhdidinə cavab olaraq əsas boşluğu doldurmağa çalışır.
Hava hücumundan müdafiə ilə bağlı məsələlər NATO müdafiə nazirlərinin iyunun 5-də Brüsseldə keçiriləcək görüşündə müzakirə olunacaq. "Bloomberg"in mənbələri bildirir ki, müzakirələr, hələlik, bağlı qapılar arxasında aparılır.
Mənbələrin məlumatına görə, NATO-nun planına əsasən, hava hücumundan müdafiə vasitələrinin potensialının beş dəfə artırılması Avropadakı üzv ölkələr üçün kollektiv hədəf olacaq. Fərdi səviyyələr (ölkələr üzrə) isə, ehtimal ki, fərqlənəcək. Bu hədəfə nail olmaq üçün konkret müddət barədə heç bir məlumat verilməyib.
Bu həftə NATO ölkələrinin müdafiə nazirləri Avropa və Kanadanın yenidən silahlanması və ABŞ-nin müdafiə sistemlərindən asılılığın azaldılması səyləri çərçivəsində Soyuq müharibə dövründən bəri ən iddialı öhdəliklərdən birini - silah ehtiyatlarının artırılmasını təsdiqləməyə hazırlaşırlar. "Bloomberg" yazıb ki, cümə axşamı - iyunun 5-də Brüsseldə keçiriləcək görüş həm də iyunun 24-25 tarixlərində Haaqada baş tutacaq NATO sammitinə hazırlıq məqsədi daşıyır.
Ukraynaya 38 dollar köçürdüyündən 12 il həbs alıb
Volqoqrad vilayət məhkəməsi Volqoqrad Politexnik Kollecinin 21 yaşlı tələbəsi Andrey Qluxovu ona qarşı dövlətə xəyanət maddəsi ilə açılmış iş üzrə 12 il müddətinə azadlıqdan məhrum edib. Andrey həbs cəzasını ciddi rejimli cəzaçəkmə müəssisəsində çəkəcək. Bu barədə "Mediazona" saytı məhkəmənin mətbuat xidmətinə istinadən məlumat verib.
Hökm bir ay davam edən məhkəmə prosesinin sonunda - mayın 29-da çıxarılıb. Onun atası Eduard Qluxov "Mediazona"ya bildirib ki, 2024-cü ilin sentyabrında təhlükəsizlik qüvvələri A.Qluxovun anası ilə birgə yaşadığı mənzilində axtarış aparıblar və ona məxsus kompüter avadanlığı götürüblər. Rusiya Federal Təhlükəsizlik Xidməti tərəfindən dindirildikdən sonra Andrey evə buraxılıb, ancaq bir ay sonra, 2024-cü ilin oktyabrında o, yenidən saxlanılıb.
E.Qluxovun sözlərinə görə, onun oğlu Andrey Rusiyanın Ukraynada apardığı müharibəyə qarşı çıxıb və Rusiya işğalçı müharibəyə başladıqdan sonra "ya hansısa oyunda, ya da bir saytda" özünü Ukrayna vətəndaşı kimi təqdim edən şəxslə tanış olub. Həmin şəxs ona iki ölkə arasında danışıqların sürətləndirilməsi məqsədilə imzalar topladığını deyib və Andreyə Ukrayna bankında hesab nömrəsi verib. Andrey həmin hesaba iki dəfə olmaqla, hər dəfə 1500 rubl göndərib.
A.Qluxov uşaq yaşlarından əlildir, o, serebral iflicindən (DCP) əziyyət çəkir. Andrey məhkəmədə özünü təqsirli bildiyini deyib.
Ukrayna Krım körpüsünü vurduğunu bildirir
Ukrayna Rusiyanı Moskvanın işğalı altında olan Krım yarımadası ilə birləşdirən körpünü sualtı partlayıcılarla vurduğunu bildirir. İki gün öncə isə Kiyev Rusiya ərazisinə dron hücumları ilə onlarla uzaqmənzilli bombardmançı təyyarəni dağıdıb.
Ukraynanın Təhlükəsizlik Xidməti (SBU) iyunun 3-də yaydığı bəyanatda bildirib ki, bir neçə aydır hazırlanan əməliyyat zamanı agentlər Kerç boğazındakı körpünün dayaqlarını 1100 kiloqramlıq partlayıcılarla minalayıblar.
SBU-nun vebsaytında yerləşdirilmiş, AzadlıqRadiosunun həqiqiliyini təsdiqlətdiyi videoda körpünün altında böyük partlayışın baş verdiyi görünür. Amma partlayışın səbəb olduğu dağıntının miqyası bəlli deyil.
SBU körpüdə “fövqəladə vəziyyət” yarandığını bildirib. Rusiya rəsmi orqanları isə bu gün körpüdə nəqliyyatın müvəqqəti bağlandığını bildirib, amma sonradan körpü üzərində maşınların hərəkəti qeydə alınıb.
Rusiya 19 kilometrlik Kerç körpüsünü 2018-ci ildə tikib, Ukraynanın cənubunu işğal etmiş qüvvələri üçün vacib təchizat xətti sayılır. Moskva Ukraynanın Krım yarımadasını 2014-cü ildə qanunsuz ilhaq edib.
Körpü 2022 və 2023-cü illərdə Ukraynanın hücumlarına məruz qalıb.
SBU iyunun 1-də Rusiyanın dərinliklərinə kütləvi dron hücumuyla azı 40 uzaqmənzilli bombardmançı təyyarəni vurduğunu açıqlayıb. Moskva 2022-ci ilin fevralında Ukraynaya qarşı başlatdığı təcavüzkar müharibədə həmin təyyarələrdən istifadə edib.
Prezident Volodimir Zelenski dron hücumunu 18 aydan çox müddətdə hazırlanan əməliyyatın “tam möhtəşəm nəticəsi” adlandırıb.
Zelenski Kerç körpüsünə hücumla bağlı şərh verməyib. Kremldən də rəsmi reaksiya gəlməyib.
Rusiya Ukrayna şəhərlərinə dron və raket zərbələri endirib
Rusiya qüvvələri Ukraynanın Sumı şəhərinə zərbə endirib, nəticədə iki nəfər həlak olub, 20-dən çox adam yaralanıb. Yaralılar arasında 17 yaşlı yeniyetmə də var. Bu barədə Sumı vilayətinin hərbi administrasiyası məlumat yayıb. Dövlət Fövqəladə Hallar Xidmətinin məlumatına görə isə, ölənlərin sayı üçə çatıb, yaralananların sayı isə 16 nəfərdir.
Rəsmi qurumlar bildirib ki, iyunun 3-ü səhər saatlarında uzaqmənzilli reaktiv yaylım atəş sistemlərindən (RSZA) beş zərbə qeydə alınıb.
Zərbələr nəticəsində çoxmərtəbəli yaşayış binası, üç fərdi ev, anbar binası, qaraj, avtomobillər və xəstəxana binası zədələnib.
Rusiya iyunun 2-dən 3-nə keçən gecə Ukraynaya dron zərbələri də endirib. Yerli hakimiyyət orqanları bildirib ki, hücum nəticəsində Çerniqov və Odessa şəhərlərində yaşayış binaları zədələnib, yaralılar var. Balakliyada isə bir nəfər həlak olub.
Çerniqov vilayət hərbi administrasiyasının rəhbəri Vyaçeslav Çaus deyib: "İlkin məlumata görə, üç nəfər yaralanıb: bir qadın və iki kişi. Ağır xəsarətlər alan bu şəxslər şəhər xəstəxanalarına yerləşdiriliblər".
O, çoxmərtəbəli binalara, məktəbə, bir neçə mağazaya, avtobus dayanacaqlarına və fərdi yaşayış evlərinə ziyan dəydiyini əlavə edib. Bir sənaye müəssisəsinin vurulduğu da qeyd olunub.
Çerniqov şəhər hərbi administrasiyasının rəhbəri Dmitri Brijinskinin sözlərinə görə isə, Rusiyanın zərbələri nəticəsində ikisi qadın, ikisi kişi olmaqla ümumilikdə dörd nəfər yaralanıb və onlar tibb müəssisələrinə yerləşdiriliblər.
Brijinski Çerniqovda çoxmərtəbəli binaya, fərdi evlərə, təhsil müəssisəsinə və sənaye müəssisəsinə ziyan dəydiyini təsdiqləyib.
Ukrayna mediası isə Odessaya dron zərbələrinin endirilməsi barədə məlumat yayıb. Odessa vilayətinin Fövqəladə Hallar üzrə Dövlət Xidmətinin məlumatına görə, hücum nəticəsində dörd nəfər xəsarət alıb. Ərzaq məhsulları saxlanan böyük anbarlarda yanğınlar qeydə alınıb. Odessa meri Gennadi Truxanovun sözlərinə görə, mülki infrastruktura ziyan dəysə də, itkilər barədə məlumat yoxdur.
Xarkov vilayətinin Balakleya şəhərində isə Rusiya dronunun endirdiyi zərbə nəticəsində bir nəfər ölüb, bir nəfər yaralanıb. Şəhər administrasiyasının rəhbəri Vitali Karabanovun sözlərinə görə, dronlar mülki müəssisəyə və açıq əraziyə düşüb. Ölən və yaralanan da elə müəssisənin işçiləridir.
İran Azərbaycana yeni səfir təyin edib
İranın ISNA xəbər agentliyi yazır ki, İran Xarici İşlər Nazirliyinin (XİN) Avrasiya şöbəsinin baş direktoru Müctəba Dəmirçilu bu ölkənin Azərbaycana yeni səfiri təyin edilib.
Bundan əvvəl İranın Azərbaycandakı səfiri Seyid Abbas Musəvi idi və onun səlahiyyət müddəti 2024-cü ilin martında başa çatmışdı.
İran XİN-in sözçüsü İsmail Bəqayi iyunun 2-də keçirdiyi mətbuat konfransında İranın Azərbaycana yeni səfir təyinatı ilə bağlı sualı cavablandırarkən deyib: "Bizim Mərkəzi Asiya və Qafqaz ölkələri ilə əlaqələrimiz çox həssas və vacibdir. Azərbaycan Respublikasına gəlincə, inzibati proses tamamlanıb, şəxs seçilib. O, təcrübəli və tanınmış diplomat və Avrasiya regionu üzrə ekspertdir".
Xatırlatma
Son zamanlar İran-Azərbaycan diplomatik münasibətlərində yaxınlaşma müşahidə olunur. Apreldə İran prezidenti Məsud Peşezkian Azərbaycana səfər edib.
Ancaq öncəki illərdə Bakı və Tehranın bir-birinin sərhədinə yaxın ərazilərdə hərbi təlimlər keçirməsi qarşılıqlı narazılıqlar doğurub. 2023-cü il yanvarında isə Azərbaycanın Tehrandakı səfirliyinə silahlı hücum nəticəsində səfirliyin əməkdaşları arasında ölən və yaralananlar olub. Bu hücum iki qonşu ölkə arasında münasibətlərin ciddi şəkildə pisləşməsinə səbəb olub. İran bu ilin mayında bildirib ki, Azərbaycan səfirliyinə qarşı törədilmiş ölümcül hücumda təqsirli bilinən şəxs edam edilib.
İstanbulda Rusiya-Ukrayna danışıqları uzun sürmədi
Bu gün, iyunun 2-də İstanbulda Ukrayna və Rusiya nümayəndə heyətləri arasında Ukraynadakı silahlı münaqişəyə son qoyulması ilə bağlı danışıqların yeni raundu keçirilib.
Nümayəndə heyətlərinin görüşü Bakı vaxtı ilə saat 15:40-da, təyin olunduğu vaxtdan saat yarımdan çox gec başlayıb. 17:00-da danışıqların başa çatdığı elan edilib. Beləliklə, danışıqlar saat yarımdan az davam edib.
Türkiyə mediası ölkənin Xarici İşlər Nazirliyinə (XİN) istinadən bildirib ki, görüş "neqativ olmayıb".
Ukrayna prezident ofisinin rəhbəri Andriy Yermak X sosial media hesabında bildirib ki, bugünkü danışıqlarda Ukrayna nümayəndə heyəti Rusiya tərəfinə geri qaytarılmasını tələb etdiyi uşaqların siyahısını təqdim edib.
"Rusiyanın qeyri-qanuni şəkildə deportasiya etdiyi, zorla köçürdüyü və ya müvəqqəti işğal olunmuş ərazilərdə saxladığı yüzlərlə uşaqdan söhbət gedir", –Yermak bildirib.
Yermakın sözlərinə görə, siyahıda yüzlərlə ad var. Onun sözlərinə görə, uşaqların qaytarılması "Rusiyanın niyyətinin səmimiliyinin ilk sınağı" ola bilər.
Bu tələb Ukrayna prezidenti Volodimir Zelenskinin iyunun 1-də açıqladığı üç əsas şərtdən biridir: "Birincisi – tam və qeyd-şərtsiz atəşkəs. İkincisi – əsirlərin azad olunması. Üçüncüsü – oğurlanmış uşaqların geri qaytarılması".
Moskva isə uşaqları müharibədən qorumaq üçün köçürdüyünü iddia edir.
V.Zelenski iyunun 2-də bildirib ki, Rusiya və Ukrayna hərbi əsirlərin mübadiləsinin növbəti mərhələsini də müzakirə edir. O, bu barədə Litvanın paytaxtı Vilnüsdə Mərkəzi Avropa və Şimali Avropa ölkələrinin iştirakı ilə baş tutan sammitdə danışıb.
Mayın 16-da İstanbulda keçirilən danışıqların ilk raundunda tərəflər hərəyə 1000 hərbi əsirin dəyişdirilməsi barədə razılığa gəlib və bu mübadilə ötən ay - mayda başa çatdırılıb.
Ukrayna prezidenti onu da əlavə edib ki, Rusiya və Ukrayna Türkiyənin vasitəsilə müharibənin bitirilməsi üçün öz baxışlarını əks etdirən sənədləri mübadilə ediblər.
+++
Ukrayna ilə Rusiya bütün ağır xəstə hərbi əsirləri və 25 yaşdan kiçik şəxsləri mübadilə etmək barədə razılığa gəliblər. Bunu Ukrayna nümayəndə heyətinin rəhbəri Rustem Umerov danışıqların nəticələrini şərh edərkən bildirib.
"Rusiya atəşkəsə və liderlərin görüşünə razı olmadı. Biz yalnız əsirlərin mübadiləsinə razılaşdıq", - o vurğulayıb.
Ukrayna iyunun 20-dən 30-a kimi yeni görüşün keçirilməsini təklif edib.
15:50
İstanbulda Ukrayna və Rusiya nümayəndə heyətlər arasında görüşün yeni raundu keçirilir.
Görüşü vasitəçi qismində çıxış edən Türkiyənin xarici işlər naziri Hakan Fidan açıb. Türkiyə Xarici İşlər Nazirliyinin X sosial media hesabında onun çıxışı canlı yayımlanıb. Fidanın sözlərinə görə, tərəflər əsirlərin dəyişdirilməsi, mümkün atəşkəs və iki ölkə prezidentlərinin görüşünü müzakirə etməlidirlər.
Nümayəndə heyətləri arasında müzakirələr qapalı qapılar arxasında keçirilir.
Rusiya nümayəndə heyətinin tərkibi mayın 16-da İstanbulda keçirilən danışıqların ilk raundundan fərqlənmir. Heyətə prezident Vladimir Putinin müşaviri Vladimir Medinski rəhbərlik edir. Ukrayna nümayəndə heyətinin tərkibində isə kiçik dəyişiklik olub. Ukrayna nümayəndə heyətinə müdafiə naziri Rustem Umerov rəhbərlik edir. Hər iki heyətdə Xarici İşlər Nazirliyinin nümayəndələri, hərbçilər və xüsusi xidmət orqanlarının təmsilçiləri var.
Ukrayna XİN-in sözçüsü X hesabında bildirib ki, xarici işlər nazirinin birinci müavini Sergiy Kislitsa danışıqlardan əvvəl Ukraynanın avropalı tərəfdaşları - Almaniya, İtaliya və Böyük Britaniyadan olan nümayəndələrlə görüşüb. Görüşdə Ukrayna prezident ofisinin rəhbərinin müşaviri Oleksandr Bevz də iştirak edib.
"Tərəflər Ukrayna və Rusiya nümayəndə heyətləri arasında bugünkü görüşdən əvvəl mövqeləri razılaşdırıblar", - Ukrayna XİN bildirib.
Bugünkü görüşdə tərəflərin münaqişənin sülh yolu ilə həlli prinsipləri və mümkün atəşkəs şərtlərini əhatə edən memorandum layihələrini təqdim etməsi gözlənilir.
Bakıda Elgün İbrahimova görə etiraz aksiyasına cəhd olub
İyunun 1-də Bakıda Gəncə sakini Elgün İbrahimovun müəmmalı ölümünə görə bir qrup fəalın etiraz aksiyasına cəhd göstərdiyi bildirilir.
Bu barədə bəzi fəallar məlumat yayıb.
Onların qeyd etməsinə görə, metronun "28 May" stansiyası ətrafında planlaşdırılan etiraz aksiyasından əvvəl ərazidən keçən bir çox şəxsi polislər saxlayıb, həmin insanları yalnız saatlarla "çək-çevir" etdikdən sonra sərbəst buraxıblar.
Hələlik, məsələyə Daxili İşlər Nazirliyindən (DİN) münasibət almaq mümkün olmayıb.
29 may
Prokurorluq Elgün İbrahimovun hündürlükdən yıxılaraq öldüyünü deyir, amma anası...
Ölümü bütün ölkədə müzakirələrə səbəb olan 18 yaşlı Elgün İbrahimovun hündürlükdən yıxılaraq aldığı xəsarətlər nəticəsində vəfat etdiyinin müəyyən olunduğu bildirilir.
Bu barədə mayın 29-da Baş Prokurorluq və Dövlət Təhlükəsizliyi Xidmətinin birgə məlumatında vurğulanır.
Əlavə edilib ki, cinayət işi üzrə bütün fərziyyələr, onun intihar etməsi, ehtiyatsızlıqdan yıxılması və ya ona ağır bədən xəsarəti yetirilməsi nəticəsində ölümün baş verməsi kimi hallar yoxlanılıb: "... Şahid ifadələri, hadisə yerinə, müşahidə kameralarına baxış, meyitin xarici, daxili müayinə edilməsi, telefon məlumatları, məhkəmə-genetik, məhkəmə-tibbi... ekspertizaların rəyləri və başqa dəlillərlə müəyyən edilib ki, Elgün İbrahimova hər hansı... xəsarət yetirilməyib, ona qarşı heç bir zorakı hərəkətlərə yol verilməyib, o, hündürlükdən yıxılmaq nəticəsində aldığı çoxsaylı xəsarətlərdən ölüb".
Vurğulandığına görə, həmçinin müəyyən edilib ki, E.İbrahimov mayın 12-də saat 16 radələrində hazırlıq kursundan çıxdıqdan sonra mobil telefonunu sataraq ayrı-ayrı şəxslərə olan pul borcunu qaytarıb.
Ana intihar versiyasına inanmır...
Birgə rəsmi açıqlamaya, hələlik, onun yaxınlarından münasibət almaq mümkün olmayıb.
Amma bugünlərdə onun anası Fizzə Zeynalova yerli mediaya açıqlamasında oğlunun intihar edə biləcəyini istisna etmişdi: "Ola bilməz, mənim uşağım həyatdolu uşaq idi. Nəyə görə intihar etməli idi?!", - o, rəsmi açıqlamadan bir gün öncə "TV Müsavat"a müsahibəsində vurğulamışdı.
Yerli mediada mayın 13-nə keçən gecə Gəncə sakini, 18 yaşlı E.İbrahimovun Texnologiya Universitetinə məxsus, hazırda istifadəsiz olan yataqxananın həyətində ağır vəziyyətdə tapılıb xəstəxanaya yerləşdirilsə də, bir neçə saat sonra vəfat etdiyi barədə məlumatlar yayılmışdı. Faktla bağlı cinayət işi açılsa da, sosial şəbəkələrdə işin açılmaması ilə bağlı tənqidlər səslənmişdi.
Polşada prezident seçkisində sağçı Karol Navrotski qalib gəlib
Polşada keçirilmiş prezident seçkilərində müxalifətdən olan sağ-mühafizəkar "Hüquq və Ədalət" partiyasının namizədi Karol Navrotski qalib gəlib. Ölkənin Seçki Komissiyasının ilkin rəsmi məlumatına görə, iyunun 1-də keçirilmiş seçkilərin ikinci turunda səslərin hamısı hesablanıb və K.Navrotski 50.89 faiz səs toplayaraq rəqibi, Varşavanın meri Rafal Tşaskovski üzərində təxminən 400 min səslə üstünlük qazanıb.
Polşanın Milli Yaddaş İnstitutunun keçmiş rəhbəri olan K.Navrotskini səlahiyyət müddəti bitən prezident Andjey Dudanın mənsub olduğu mühafizəkar "Hüquq və Ədalət" partiyası dəstəkləyirdi. Duda ardıcıl iki müddət prezident postunda olub.
K.Navrotski sağçı və millətçi siyasi baxışlara sahibdir və ABŞ prezidenti Donald Trampın siyasətinə simpatiyasını gizlətmir.
2024-cü ilin fevralından Navrotski Rusiyada axtarışdadır. Onun haqqında bu qərar Polşa ərazisində Qızıl Ordu abidələrinin sökülməsi ilə bağlı açılmış cinayət işi çərçivəsində verilib.
Digər namizəd Tşaskovski isə 2018-ci ildən bəri Varşava şəhərinin meri vəzifəsini icra edir, avropayönümlü və liberal siyasətə sadiqdir. Onu namizədliyini hazırkı baş nazir Donald Tuskun rəhbərlik etdiyi "Vətəndaş Koalisiyası" partiyası dəstəkləyirdi.
Mayın 18-də ölkədə keçirilmiş seçkinin birinci turunda Tşaskovski səslərin 31.4 faizini toplayaraq Navrotskini 2 faizdən az fərqlə qabaqlamışdı.
Damın uçması nəticəsində xəsarət alan məhkum vəfat edib
İyunun 1-də 12 saylı Cəzaçəkmə Müəssisəsinin damının uçması nəticəsində xəsarət alan məhkum vəfat edib.
Bu barədə Ədliyyə Nazirliyi məlumat yayıb.
Məsələyə, hələlik, adıçəkilən məhkumun yaxınlarının münasibəti bəlli deyil.
1 iyun
Bakıda cəza evinin dam örtüyü uçub
İyunun 1-də saat 13:10-da Azərbaycandakı 12 saylı Cəzaçəkmə Müəssisənin məhkumlar üçün nəzərdə tutulmuş yaşayış binasının dam örtüyünün uçduğu, nəticədə bir nəfər məhkumun xəsarət aldığı bildirilir.
Bu haqda ölkənin bir sıra saytlarına Ədliyyə Nazirliyinin mətbuat xidməti məlumat verib.
Vurğulandığına görə, müəssisədə cəza çəkən digər məhkumlar və işçi heyəti arasında xəsarət alan olmayıb.
Həmin müəssisə Bakının Qaradağ rayonu Qızıldaş qəsəbəsində yerləşir.
Azərbaycandakı bir sıra həbsxanalarda həm ümumilikdə saxlanma şəraiti, həm verilən qida, həm də məhbusların hüquqları ilə bağlı tez-tez şikayətlər eşidilir. Amma Penitensiar Xidmətin məsul şəxsləri bununla bağlı tənqidləri qəbul etmirlər.
